Matapang na Paglaban ni Xiao

Mga Minamahal,

Nais ko pong ibahagi ang kalagayan ni Zabdielle Xiao Manahan (mas kilala bilang XiaoXiao). Siya po ay 9 na taong gulang, taga Orani Bataan at kasalukuyang nakikipaglaban sa kanyang buhay. Nakaramdam po sya ng matinding pananakit ng tiyan, pagsusuka at pagkahilo. Dahil dito, isinugod po sya sa ospital at sumailalim sa sya sa mga laboratory tests, at CT Scan na ang resulta ay mayroon pong nakitang malaking bukol(halos singlaki ng kamao ng isang ganap na tao) sa ibabang kanang bahagi ng kanyang Tiyan. Kinakailangan po niyang sumailalim sa maselang operasyon para matanggal ang nasabing bukol. Nakita rin po na may Pulmonary Edema (likido sa kanyang baga) na tinatanggal sa kasalukuyan upang mapaghandaan ang kanyang operasyon.

Lingid po sa kaalaman ng karamihan, hindi po pangkaraniwan ang kanyang sakit lalo na sa mga batang katulad niya.

Kaya naman po ay humihingi kami ng tulong pinansyal upang maisakatuparan ang kanyang operasyon at mapahaba pa ang kanyang buhay. Naniniwala po kami na malalampasan namin ang pagsubok na ito lalo na po sa inyong pagtugon sa kabila ng pandemiya.

Hindi man po namin lubos maunawaan ang hinaharap, ngunit nagtitiwala kami na mayroong Diyos na nagbibigay ng awa, kagalingan at kasama naming humaharap sa pagsubok na ito.

Taos puso po ang aming pasasalamat sa inyong bukal sa pusong pagbibigay at ang Diyos na po ang magbalik sa inyo ng masaganang biyaya at pagpapala sampu ng inyong pamilya.