AHON PILIPINAS!

HINDI TAYO PASISIIL

Napakasakit na pumapanig ang ating sariling gobyerno sa mga manlulupig sa halip na makinig, maniwala, at tumulong sa mga kababayan nating mangingisda.

Matapos makita kung paanong marami sa ating kababayan ang nagalit sa pang-aapi at pag-iwan sa ating mga mangingisda, biglang nangako ngayon ang gobyerno ng maliliit na bangka at pautang na pera.

Pero naranasan ko na ang pangako ng gobyernong ito. Mahigit dalawang taon na ang pangako nitong tutulong sa Marawi—pero wala pa ring nangyayari.

Kaya minabuti kong kumilos ngayon para tulungan ng diretso ang mga mangingisda at ang kanilang mga pamilya. Habang pinapaayos ang nasirang bangka, mga dalawang buwan silang walang maipapakain sa kanilang mga anak.

Tulungan natin sila ng kahit kaunti. Ipakita natin sa mundo—at sa mga manlulupig—na hindi natin iiwanan ang ating kapwa Pilipino.

Mahigit P1Milyon at mahigit dalawang buwan ang kailangan para ipa-ayos ang bangka na sinira ng mga mangingisdang Tsino.

Habang nag-hahanap ng pera sa pag-papaayos ang may-ari ng bangka, walang pagkikitahan ang ating mga kababayan.

Humihiling ako ng P220 na donasyon, sampu para sa bawat isang mangingisda, para umabot tayo sa P422,400 na kakailanganin nila at ng kanilang mga pamilya sa susunod na dalawang buwan. (Kung nais nyo namang magbigay ng higit pa sa P220, maluwag po naming tatanggapin at iaabot sa kanila ang inyong tulong.)

Maraming salamat. Mabuhay ang mangingisdang Pilipino.