A Family in Desperate Need- عائلة محتاجه لدعم من أصحاب النخوة

السلام عليكم ورحمة الله وبركاته

عائلة من سكنة بغداد، بحاجة ماسة الى مساعدة من أصحاب النخوة العراقية ـ

العائله مكونه من الأم و الأب وثلاثة أولاد، أعمارهم مختلفه بين ٩ الى ١٦ سنة

الأب كان يشتغل فلاح في بيت بمنطقة اليرموك وسنين بقى يشتغل عند هذه العائلة لحد ما العائله سكنته عدهم بالطابق الثاني، و تزوج و فتح بيت وصار عنده ولد، وصاروا كلهم عائله وحده.

لكن صارت الحرب الأخيرة، وأصحاب البيت أبوهم إنخطف واضطروا يبيعون البيت حتى يطلعوه، و سافروا، وبقت هذه العائله بدون سكن ولا شغل ومستقبل مجهول.

هذه العائله تهجرت، وراحت سكنت بمنطقه شعبيه تعبانه، لا أمن ولا أمان، ببيت هيكل لان كان رخيص، ومع ذلك صاحب البيت طلعهم لان ما كدروا يدفعون الايجار، و ظلوا ينتقلون من بيت لبيت، سنين وهمه على هالحال، والأب ظل على نفس شغلته،

فلاح، الي راتبه مايوكل خبز، ولو يحصل راتب لو ميحصل

ماكدر يشتغل غير شغله، لان كلها صارت بالواسطات، وهمه ناس على كد حالهم

صار عدهم ولد ٢ زياده، والولد كبروا على هذه العيشه لحد ما وصلوا عمر كامو يخجلون من يشوفون زمايلهم بالمدرسه شلون لابسين و شلون عايشين.

الأم المسكينه حالتها النفسيه تدمرت لان تشوف ولدها محتاجين وهي ماتكدر تسوي شي، هذا غير مصاريف المدرسه والكتب والملابس

حتى الترفيه صار حصره على الولد، مدينة العاب ميكدرون يروحون لان ماعدهم مصاريف الروحه والجيه، واذا يوم راحو معناها راح يقصرون بالاكل والشرب.

إضافة الى الدين الي مايخلص، لان ابو البيت مايصبر على إيجار، فــيضطرون يتداينون في سبيل مايطلعون مره ثانيه ويتبهذلون

أما بالنسبه للدعم من الأهل، فالطرفين ماعدهم أهل، وبالمقابل ماكو أحد يساعدهم بوقت الشدة، لا عدو ولا صديق.

الأم دتحاول بشتى الطرق انه تطور من حالتهم، الى متى يبقون محتاجين لهذا وذاك، مستقبل أولادهم مجهول، مع العلم همه من المتفوقين بمدارسهم، لكن هذا وحده مو كافي، باجر عكبه يصيرون جامعات وراها راح يحسون بنقص من يشوفون اصدقاىهم بالجامعات وهمه لا

حالياً همه ساكنين بهيكل بيت، مثل ما واضح بالصور، بمنطقه شعبيه بعيده جداً عن المركز، و وسائل النقل بيها شبه معدومه، مثل ما معروف انه مو أي تكسي يقبل يفوت هيج مناطق مابيها شارع.

لذلك فكرت العائله انه تشتري توكتوك، هم يسترزقون منه وشغل ثابت، وهم يكسبون أجر ويساعدون جيرانهم وخصوصي الكبار بالعمر، ومثل ما معروف انه أجرة التوكتوك اقل من التكسي لهذا راح يكون مرغوب أكثر لأصحاب الدخل الضعيف.

فــترجو العائلة من كل أصحاب النخوة انه تتبرع ولو بمبلغ بسيط وراح يدعولكم وتكسبون أجر

والسلام عليكم ورحمة الله