國際廣告大獎眾籌計劃 – D&AD Impact Awards 2019

首先，多謝各位喺第一波行動對我哋嘅幫助同支持。

再介紹多一次自己，我哋係一群熱愛香港、熱愛自由創作嘅廣告人，我哋希望將今次反送中運動包裝成一個Campaign，然後入唔同嘅國際廣告大獎（LIA, Webby, Cannes等等），希望借廣告獎引起更多國際關注，甚至將來拎到獎時，可以邀請勇武同和理非代表一齊上台宣讀宣言，以及呼籲國際作進一步嘅支援行動。所有獎項，我哋都會以A group of Hongkongers嘅署名進行投稿。

今次第二波行動，我哋會入D&AD Impact Awards，係一個表揚任何利用創意方法、為社會帶嚟正面轉變嘅國際獎項，2017年Fearless Girl都曾經獲得過呢個獎。而獎項類別方面，我哋選擇咗Community and Civic Engagement，呢個類別適用於任何復興失落嘅傳統、連接跨世代及跨文化人士、透過社區合作支援人道需求，同埋促進民主發展嘅創意解決方案。

我哋今次會以文字解說同短片形式，繼續整合整個反送中運動入面，所有「去大台、去中心化」形式創作嘅文宣，以及繼而發起嘅多元化民眾活動，並由香港連繫全球，最後會繼續強調五大訴求，缺一不可，希望得到國際支持。

呢個項目報名費原價係US$650，大會知道我哋以香港運動為題入獎，決定將我哋定義為NGO類別，可以享有50%優惠，所以實際報名費係US$325。

我哋由衷希望各位廣告同行可以繼續支持呢個行動，而第二波眾籌我哋會以港幣$2,530為目標，差額及平台費用我哋小隊成員會自行補貼，如果籌款超過目標數，我哋會將多出嘅所有款項捐去星火同盟。我哋亦會繼續透過廣告人TG Group，發佈入獎嘅情況。

最後，各位香港同行，場仗只係打到一半，唔好放棄，一齊捱埋落去好唔好？終有一朝，當我哋再次踏出奮鬥房，唔使再摸黑返屋企，而係一齊相約煲底，迎接晨曦。

我哋相信呢一日，一定會嚟。

光復香港，時代革命

五大訴求，缺一不可

願榮光歸香港

第一波-London International Awards (LIA) 眾籌活動詳情

https://assets.gogetfunding.com/?p=6277015